شروط الاستخدام

رخصة استخدام لبرنامج فيكسل على أجهزتك طول مدة اشتراكك. البرنامج بيشتغل على جهازك، والاشتراك بيحدد الباقة وحدودها — عدد الرسائل والمزايا المتاحة.

• الدفع بيتم بفودافون كاش أو انستا باي على الأرقام المعروضة في حسابك، وبتبعتلنا صورة الإيصال ورقم العملية.
• التفعيل مش فوري. بنراجع كل تحويل بإيدينا، وده بياخد وقت. الاشتراك بيبدأ من ساعة التفعيل مش من ساعة التحويل.
• كل رقم عملية بيتقبل مرة واحدة. لو الرقم اللي بعتّه متسجّل قبل كده، الطلب هيترفض — لو ده حصل معاك بالغلط كلّمنا.
• لو التحويل مش مطابق للمبلغ أو مش ظاهر في الإيصال، هنرفضه ونقولك السبب.

لو البرنامج مااشتغلش على جهازك ومقدرناش نظبّطه، بنرجّع فلوسك كاملة خلال أول ١٤ يوم. بعد كده الاشتراك مش مسترجع، بس تقدر توقف التجديد أي وقت.

• البرنامج بيرد على عملائك باسمك. الردود مسؤوليتك — راجع الإعدادات واعرف البرنامج بيقول إيه قبل ما تسيبه يرد لوحده.
• استخدام واتساب خاضع لشروط واتساب نفسها. الإرسال الجماعي أو الرسائل غير المرغوبة ممكن يخلي واتساب يوقف رقمك، وده قرارهم مش قرارنا ومالناش يد فيه.
• ماتستخدمش البرنامج في حاجة مخالفة للقانون أو في نصب أو تحرش.
• الرخصة لنشاطك إنت. ماتبيعش وصول لحسابك لحد تاني.

البرنامج بيعتمد على موديل ذكاء اصطناعي، والموديلات بتغلط. بنعمل اللي علينا عشان يبقى دقيق، بس مابنضمنش إن كل رد هيكون صح أو مناسب. اللي محتاج قرار بشري بيتحوّلك إنت — وده مقصود.

مسؤوليتنا في أي حالة مابتتعداش قيمة اللي دفعته في آخر ١٢ شهر.

نقدر نوقف حساب بيخالف الشروط دي، وهنقولك السبب. لو أوقفنا الخدمة كلها، هنبلّغك قبلها بشهر ونرجّع الجزء اللي مااستخدمتوش من اشتراكك.

لو غيّرنا الشروط دي هنحدّث التاريخ فوق، وهنبعتلك إيميل لو التغيير كبير. استمرارك في الاستخدام بعدها معناه موافقتك.