سياسة الخصوصية

محادثات عملائك على واتساب مابتوصلناش. البرنامج بيشتغل على جهازك، والذكاء الاصطناعي بيقرا ويرد من على الجهاز نفسه. اللي بيوصلنا هو بيانات حسابك واشتراكك بس.

• كل رسائل عملائك وصورهم وفويساتهم
• جلسة واتساب وأرقام العملاء
• الردود اللي البرنامج بيكتبها، والتصميمات اللي بيولّدها
• الموديل نفسه وكل حساباته

ده كله في فولدر جنب البرنامج على جهازك. مفيش نسخة عندنا، ومفيش طريقة نوصلها — لا إحنا ولا حد تاني.

• حسابك: الإيميل والاسم والصورة، زي ما بيجولنا من جوجل لما تسجّل دخول. مابنشوفش باسوردك أبدًا.
• اشتراكك: الباقة وتاريخ بدايتها ونهايتها، وعدد الرسائل اللي البرنامج ردّ عليها — رقم مجرّد، من غير أي محتوى.
• إثبات الدفع: صورة الإيصال ورقم العملية اللي بتبعتهم لينا. محفوظة في مكان مقفول، وبتتفتح للمراجعة بلينك بينتهي بعد دقايق.
• سجل العمليات: مين عمل إيه وإمتى على حسابك — عشان لو حصلت مشكلة نعرف نرجع نشوف.

مابنبيعش بياناتك ولا بنأجّرها ولا بنستخدمها في إعلانات. الخدمات اللي بنستعين بيها بتشوف الجزء اللي شغلها بس:

• Google — تسجيل الدخول
• Supabase — قاعدة بيانات الحسابات والاشتراكات
• Vercel — استضافة الموقع وملف التسطيب

وبنطلع بيانات لجهة رسمية لو صدر أمر قانوني ملزم، وبس.

تقدر تطلب نسخة من بياناتك، أو تصحيحها، أو مسح حسابك بالكامل. ابعتلنا على hello@vixcell.com ونرد في خلال أسبوع.

مسح الحساب بيشيل بياناتك من عندنا. اللي على جهازك بتمسحه إنت بحذف فولدر البرنامج — إحنا مش قادرين نوصله عشان نمسحه.

بيانات الحساب والاشتراك بتفضل طول ما الحساب شغال. صور الإيصالات بتتمسح بعد سنة من مراجعتها. سجل العمليات بيفضل سنتين.

لو غيّرنا حاجة في السياسة دي، هنحدّث التاريخ فوق. ولو التغيير كبير، هنبعتلك إيميل — مش هنغيّر ونسيبك تكتشف.